قصيدة الكرسي " زجل " ....

قصيدة الكرسي كتبت في أحداث الفتنة التي دارت في غزة
الكرسي
مشكلتنا ماهي مشكلة اليهود
ولاهي مشكلة الجهاد
ومش جدار ومش سدود
لو قفلوا باب البراق
بنعدي من باب العمود
من بدا التاريخ وهم هم اليهود
ما بتثنينا المعارك
غير بتزيد الصمود
ما خضعنا للخلايق
وما تهزهزنا القيود
بس نفكر كيف نقحم
كيف نجتاز الحدود
كيف كانوا وكيف كنا
ند من جد الجدود
بس يا خسارة يا ماضي
ليتك بمرك تعود
...
تغيرت كل المبادئ والذهون
مالت البارودة حتى
شكنا الفارس يخون
غابة والهم اللي اكبر
هو يكون أو هو يكون
ما يفكر لحظة وحدة
تزهق النفس وتهون
ما قروا قران الله
وصلوا مكة والمدينة
وافتكرنا يفهمون
وصلوا سيدنا الرسول
فشلوه وما طلع بيده يمون
نسوا الإسلام نسوا الأوطان
وسيفهم عالحلق مسنون
تعوا شوفوا انتفاضتنا
تعوا شوفوا كرامتنا
غدت في ايد هالمجنون
وتهنا بين كذابين
وتهنا بين سفاحين
وصار العاقل الملعون
وأسرى من كلا الطرفين
تبادل صفقة مع مسجون
لها لدرجة وصل هالحال
اخو بسلاح أخوه مهيون
غريبة ناس هاي الأرض
بتستنى من الله العون
حرب وانعدمت الأخلاق
ولا مؤدب في هالمليون
ذبحتوا الحب والخوة
طعنتوا هالوطن فينا
وذبلت زهرة الحنون
خسارة فيكم الدمعة
غشت أبصاركم وعيون
جهنم بكرة موعدكم
ولعنتنا تطاردكم في كل الكون
...
بتوصيني أمي مبارح
يمي امشي الحيط واسكت
بتحكي والكلمة مقهورة
خبت صوري وصور أخواتي
وما خلت ولا حتى صورة
حبستنا في الدار وقالت
لا في حجلة ولا في كوره
نسألها طب يمي ليش
قالت هالحارة محظورة
دوشة بره وصوت زعيق
ورصاصتهم حتى عورة
ماحنا جبنا تلفزيون وتعوا نتفرج
يمي..
شفتي الأمن الوطني ؟
يمي اسكت..
شفتي الطفل وهو ممزق ؟
يمي اسكت !
شفتي الشيخ وهو معلق ؟
يمي اسكت !
شفتي الجامع كيف مخزق ؟
يمي اسكت !
يمي قومي الطلقة بظهرك !!
يمي اسكت..
يمي اجتازت عبرت صدرك !!
يمي اسكت. اسكت .اسكت
...
اعذرني يا سيدي المسرح
مانا لاقي غيرك مطرح
أمي ماتت...!
واللي قتلها شخص ترشح
دبت صوره هالحيطان
واللي صور..
ما ورآنا انه مسلح
عاشوا فينا وما عرفناهم
مش معقولة عاشوا فينا
دمع عيوني صاير يجرح
دب الخوف بكل الشارع
وما عادت الكلاب بتنبح
الملثم خرب البلاد
وغزة في الأحقاد بتسبح
اسكت يمي وألا احكي
اسكت يمي وألا اصرخ
افجر يمي وألا افضح
مش ساكت سامحيني يمي
دمعي وخوفي قرب يذبح
...
تعي شوفي مش ضايل حد
شبان وتركت البلاد
يئست زهقت حلم أنهد
متعلم وعامل وفلاح
يمي هجرة بيحكوا جد
ماشي مطنش كل الدنيا
وللواحد ما حتى عد
تحيرنا ايش نقول
عودوا عودوا
بلكن تتعدل الأحوال وتزبط بكرة
بدم الشهداء بالله تعودوا
بلكي تخلص هالاحزان وتيجي البشرى
كم مرة بتنعاد الهجرة
هم غيمة وبكرة تعدي
وخلونا نكمل هالفكرة
...
انسحبوا مبارح من غزة
وقلنا نعلي ونبني نعمر
تفاجئنا لسه فينا وجوانا
ضايل مستعمر
نبني الوطن ونرفع شانه
وايدين الخارج بتقرر
نتساءل في الآخر ليش
ومين الضارب والمضروب
مين الغالب والمغلوب
مين السالب والمسلوب
مين الناكب والمنكوب
والغلبان اللي متدمر
تايه فينا الصح وشارد
والعقل اللي فينا تخمر
...
من شانك يا عم الكرسي
من شانك هدولي أمسي
قتلوا اخوي وخربوا بيتي
وهدوا عرسي
حرقولي باقي أحلامي
ومالي ذنب وحابس حسي
أتذكرنا يا تاريخ وأتذكرهم
واصحا تنسى الشعب المنسي
ماحنا منهم ولاهم منا
ابرأ منهم دمي ووطني
وتبرا منهم ارضي وقدسي
من شانك يا عم الكرسي

مشكوور عاشق الفتح على القصيده

» **أحلى"وأفضل"وأحسن"ل عبه**
» نغمات أغنية الإنطلاقة الـ 44 " عيـد المجـد الفتحـاوي "
» قوانين قســـم "الجمال والاناقه"
» " الفلسطينيون جوهرة الشرق الاوسط "